УИХ-ын нэгдсэн чуулган эхэллээ

УИХ-ын нэгдсэн чуулганын өнөөдөр /2016.02.04/-ийн хуралдаан хуваарь ёсоор 09 цагт хуралдах ёстой ч 130 минутаар хоцорч эхэллээ. Чуулганы танхимд одоогийн байдлаар Ардчилсан намын бүлгийн 35 гишүүнээс 34, Ардын намын бүлгийн 26 гишүүнээс 19, “Шударга ёс” эвслийн бүлгээс 11 гишүүнээс 10, ИЗНН-аас нэг, мөн бие даагч хоёр гишүүн байна. Ардын намын гишүүд чуулганы танхимд орж ирэлгүй хоёр цаг хүлээлгэсний эцэст нэгэнт ирц бүрдэж, чуулган эхэлсэн хойно танхимд орж ирцгээв. Намрын чуулганаар хэлэлцэхээр төлөвлөсөн асуудлын жагсаалтаас 37 асуудал үлдээд байгаа тул үлдэж буй богино хугацаанд шахан хэлэлцэж, амжихгүй бол ээлжит бус чуулган зарлаж хуралдана гэдгийг УИХ-ын дарга хэдийнэ мэдэгдсэн. Гэтэл парламент хэмээх анги доторхи нэгэн “салаа” болох МАН-ын бүлгийн гишүүд бүтэн хоёр цагаар ажил саатуулж байгааг “ангийн дарга” хуралдааны эхэнд зэмлээд авналээ.