С.Эрдэнэ сайд өөрөө огцрох “Нүхээ ухсан уу”

С.Эрдэнэ сайд “үүргээ” хэтрүүлэн биелүүлсэн учраас огцорчихож ч мэдэхээр болоод байна. Хөдөлмөрийн яамны үүрэг гүйцэтгэгч болсныхоо дараагаас л хууль ёс, дүрэм журмын дагуу томилогдсон албан хаагчдыг баруун, солгойгүй тушаал гаргаж халсан нь хууль зөрчсөн хэрэг болов. Хуулийг уландаа гишгэсэн С.Эрдэнэ сайдын энэ асуудал л түүнийг “дан дээлтэй” болгоход хангалттай. Хуулиараа бол сайдын үүрэг гүйцэтгэгч тухайн яамны бүтэц зохион байгуулалтыг өөрчлөх, албан тушаалтнуудыг дур мэдэн халахыг хориглосон байдаг ажээ. Гэтэл С.Эрдэнэ сайд “гурван давхар” дээлэндээ халууцсан уу яасан, гэнэт л “үүргээ” хэтрүүлэн биелүүлж, “бүтцийн өөрчлөлт” нэрийн дор төрийн жинхэнэ албан хаагчийг хоморголон халж байгаа нь илтэд хууль зөрчсөн үйлдэл болов. Шаргал ордон дотор С.Эрдэнэ сайдын халаа сэлгээний тухай асуудал хуурай өвсөнд тавьсан түймэр мэт тархаж байна. Арга ядсан зарим гишүүн “С.Эрдэнэ сайд бараг огцрох нүхээ өөрөө ухчих шиг боллоо” хэмээн шивэр авир хийж байх вэ дээ. Юутай ч АН хийгээд АН-ын дарга, УИХ-ын дарга З.Энхболдын өмнө Монгол Улсын хууль хүчин мөхөсддөг юм билээ. Харин С.Эрдэнэ сайдад Монгол Улсын хууль үйлчлэх эсэхийг харах л үлдлээ. Хэрэв С.Эрдэнэ сайдын суудалдаа хэвээр үлдвэл эрх баригчид хуулийн дээр, төрийн дээр байгаа нь улам бүр батлагдана.