Хүүхдийн цогцос өнөөдрийн 16 цаг орчимд олсон

2025 оны есдүгээр сарын 17-ны өдрийн 16:57 цагт Хөвсгөл аймгийн Тариалан сумын тавдугаар багийн нутаг дэвсгэр “Сайхан мод” гэдэг газраас 2 настай хүү машинаас буугаад алга болсон гэх дуудлага мэдээлэл онцгой байдлын байгууллагад бүртгэгдсэн байдаг.

Хүүг эрэн хайх ажиллагаа есөн өдөр үргэлжилж өнөөдөр хүүгийн цогцсыг олсон талаар цагдаагийн байгууллагаас мэдээлсэн. Энэ талаар  ЦЕГ-ын хэвлэл мэдээллийн төвийн ахлах мэргэжилтэн, хошууч С.Баярбилэг мэдээлэл өглөө.

Энэ оны есдүгээр сарын 17-ны өдөр Хөвсгөл аймгийн Тариалан суманд хоёр настай хүүхэд алга боллоо гэсэн мэдээлэл анх бүртгэгдсэн. Мэдээллийн хүрээнд төрийн чиг үүрэг бүхий байгууллагууд, иргэд олон нийтийн хамтарсан эрэн хайх ажиллагааг зохион байгуулж өнөөдрийг хүртэл ажилласан. Өнөөдөр буюу есдүгээр сарын 25-ны өдрийн 16:00 цагийн орчимд эрэн хайж байсан хоёр настай хүүгийн цогцсыг алга болсон газраас 3-4 км орчим зайнаас олсон. Үнэхээр харамсалтай үйл явдал боллоо. Цагдаагийн байгууллагаас анх эрэн хайх ажиллагааг хуульд заасан үндэслэл журмын дагуу эрэн хайх, тухайн асуудалд мөрдөн шалгах ажиллагаа явуулах зэрэг хуульд заасан чиг үүргийг өнөөдрийг хүртэлх хугацаанд хэрэгжүүлээд ажиллаж байна. Хүүхэд алга болсон асуудал, цогцос олдсон асуудалд хэргийн газрын хамгаалалт аваад мөрдөн шалгах ажиллагаа энэ цаг үед үргэлжлээд явж байна. 

-Хүүгийн цогцсыг ямар газраас олов. Ямархуу байдалтай байсан бэ?

-Тухайн орчны нөхцөл байдал модтой, тал хосолсон. Одоогоор хүүгийн цогцост үүссэн шарх ч гэдэг юм уу, ил харагдах байдал дээр шалгалт хийж байна. Шинжээчийн дүгнэлт гарсны дараа дахин мэдээлэл өгч болно. 

-Анх алга болсон гэх газраас 3-4 км зайд олдсон гэхээр тэр нутаг дэвсгэрээр эрэн хайгаагүй байсан юм уу. Эрэн хайх ажиллагаа яг аль хавиар нь хийгдсэн бэ?

-Эрэн хайх ажиллагаа ямар түвшинд, ямар маршрутаар явсан мэдээлэл нь тодорхойгүй байна. Эрэн хайх ажиллагааг тодорхой байгууллагын алба хаагчид ахлаад хийсэн. Эрэн хайх ажиллагаатай холбоотой, нас барсан нөхцөл байдлын талаарх мөрдөн шалгах ажиллагаа явагдах учраас тухайн үед нь мэдээлэл өгөх нь зүйн хэрэг байх.