Н.Алтанхуяг сандрахын учир юу байна

Ерөнхий сайд асан, УИХ-ын гишүүн Н.Алтанхуяг сүүлийн үед нэлээд сандрах болсон бололтой. Учир нь түүний хүргэн гэх Г.Дэнзэнг АТГ-аас саатуулсантай холбоотойгоор Н.Алтанхуягийг тойрсон мэдээлэл хэвлэлийн хуудаснаас салахаа болилоо. Г.Дэнзэнг саатуулж, шалгах үеэр Н.Алтанхуяг АТГ-ын үйл ажиллагаанд саад хийсэн тухай мэдээлэл ч гарч байв. Тухайлбал, Г.Дэнзэнгийн эхнэр Г.Уянгын ажиллуудаг “Говь повер” компанийн оффис болон “Хаан жимс”-ийн оффист нэгжлэг хийж, хэрэгт холбоотой байж болзошгүй баримтуудыг хураан авах үеэр Ерөнхий сайд асан Н.Алтанхуяг ирж АТГ-ынхны ажилд саад учруулж, хөөж туусан талаар зарим сайтад прокурорын байгууллагын эх сурвалж мэдээлсэн байдаг.Тэгвэл Н.Алтанхуяг энэ талаар АН-ын бүлгийн гишүүддээ хандаж захидал илгээсэн гэх мэдээлэл өчигдрөөс хэвлэлээр гарч эхэллээ. Тэрбээр захидалдаа “Н.Алтанхуяг миний хөрөнгө орлогын мэдүүлэгтээ мэдүүлсэн “Хаан жимс” жуулчны баазын ажлын байранд АТГ-аас нэгжлэг хийж УИХ-ын гишүүн миний бүрэн эрхэнд халдлаа. Мөн энэ үеэрээ миний эгчийн хүүхдийг саатуулан байцаалт авахыг оролдлоо” гэж дурдсан гэнэ. Ямартай ч Н.Алтанхуяг энэ асуудалд УИХ-ын гишүүний бүрэн эрхээрээ түрээ барихыг оролдож байгаа бололтой. Тиймдээ ч тэрбээр Эрүүгийн байцаан шийтгэх хуульд нэмэлт, өөрчлөлт оруулах тухай, Прокурорын байгууллагын тухай хуульд нэмэлт оруулах тухай хуулийн төсөл, Эрүүгийн байцаан шийтгэх хуульд нэмэлт, өөрчлөлт оруулах тухай, Прокурорын байгууллагын тухай хуульд нэмэлт оруулах тухай хуулийг хэрэгжүүлэх зарим арга хэмжээний тухай УИХ-ын тогтоолын төслүүд санаачилсан бололтой.Түүний санаачилсан хуулийн төслүүдээс үзэхэд тэрбээр цагаан захтнуудын гэмт хэргийг өмгөөлсөн зүйл заалт нэлээд байгааг анзаарч болно. Тодруулбал, Эрүүгийн байцаан шийтгэх тухай хуульд нэмэлт, өөрчлөлт оруулах тухай хуулийн төсөл нь таван зүйлтэй байгаа юм. Тухайлбал, “”Эрүүгийн байцаан шийтгэх хуулийн 26 дугаар зүйлд “Улсын ерөнхий прокурорын дэргэдэх Мөрдөн байцаах алба нь тагнуул, цагдаагийн байгууллагын ажилтан, хэрэг бүртгэгч, мөрдөн байцаагч, прокурор, шүүгчийн үйлдсэн хөнгөн гэмт хэрэгт хэрэг бүртгэл явуулна” гэсэн 26.1 дэх хэсэг нэмсэн” гэсэн байгаа юм. Энэ тохиолдолд АТГ-ын дэргэд байгаа Мөрдөн байцаах албыг салгаж, ингэснээр улс төрийн буюу цагаан захтнуудын хэрэгт хэрэг бүртгэл явуулах эрх зүйн орчингүй болох байдал харагдаж байгаа юм.

Н.Алтанхуяг өнгөрсөн онд Ерөнхий сайдаар ажиллаж байхдаа Л.Гансүхийг хоригдож байхад нь хорих ангид эргэсэн. Тухайн үед АТГ-аас “Ерөнхий сайдын долдугаар сарын 31-нд гаргасан мэдэгдэл нь Сэжигтэн яллагдагчийг баривчлах, шийдвэрийг биелүүлэх тухай хуулийн 19.2 дахь заалтыг зөрчиж хорих шийдвэр гаргасан эрх бүхий албан тушаалтны буюу түүний удирдах дээд албан тушаалтны бичгээр олгосон зөвшөөрөлгүй хоригдсон этгээдтэй уулзсан.

Эрүүгийн хуулийн тусгай ангийн 245.2 буюу Хэрэг бүртгэлт, мөрдөн байцаалт, шүүн таслах ажиллагаанд саад учруулсан болон Хууль зүйн сайдын тушаалаар батлагдсан “Баривчлах цагдан хорих байрны дотоод журам”-ын 12.1 дэх заалтыг зөрчсөн хэмээн үзэж байна” хэмээн Н.Алтанхуягийг хууль зөрчсөнийг мэдэгдсэн байдаг. Гэсэн хэдий ч Н.Алтанхуяг, Х.Тэмүүжин нар Ерөнхий сайд, сайд, УИХ-ын гишүүний бүрэн эрхээрээ түрээ барьж ямар ч хариуцлага хүлээгээгүй билээ.

Тэгвэл хууль зөрчсөн нь тодорхой байхад Н.Алтанхуягийг АТГ шалгахгүй байгаа нь сонин. Магадгүй энэ удаа түүнийг шалгахаар болсон байж ч магад. Тиймээс Н.Алтанхуяг яаран сандран хуулийн төсөл санаачилсан байх магадлалтай. Түүгээр ч зогсохгүй Н.Алтанхуяг “Хаан жимс”-т нэгжлэг хийхийг завдсантай холбоотойгоор УИХ-ын Тусгай хяналтын дэд хороонд хандсан гэх мэдээлэл ч гарч байна. Мөн Улсын Ерөнхий прокурорын харьяанд байсан Мөрдөх албыг АТГ-т шилжүүлснийг Н.Алтанхуяг эсэргүүцэж байгаа. Тиймдээ ч дээрх Мөрдөн байцаах албыг АТГ-аас салгахаар хуулийн төсөл санаачлаад байгаа юм. Ингэснээр цагаан захтнууд өршөөгдөх боломж үүсэх талтай. Уг нь  Н.Алтанхуяг ийнхүү сандарч, ийш тийш бичиг захидал илгээж, УИХ-ын гишүүний бүрэн эрх ярьж байхаар зүгээр шалгуулаад буруугүй бол түүнийгээ тогтоолгочихвол зүгээр юм даа гэж олон нийт үзэж байгаа нь нууц биш. Учир нь хууль хүн бүрт тэгш үйлчлэх ёстой. Үүнийг Н.Алтанхуяг мэдэж л баймаар. Эсвэл түүнд үнэхээр сандрах шалтгаан байна уу.