Төр Төмбөгөр
Ерөнхий сайд асан Н.Алтанхуягийн хүргэн Г.Дэнзэн эх орондоо ирээд өчигдөр хэвлэлд анх удаа ярилцлага өгсөн. Ярилцлагадаа өөрийгөө хэлмэгдсэн, Эрдэнэс Тавантолгой ХК-ийн ТУЗ-ийн даргаар долоон сар ажиллахдаа нэг төгрөгийн тендер авч, мөнгө замшигдуулаагүй гэжээ.
Тэгвэл яагаад түүнтэй холбоотой гэх 17 тэрбум төгрөгийн тендерийн булхай нэр холбогдох болов. Мөн өчигдөр орой 19 цагаас хойш түүнийг АТГ-аас баривчилсан гэх мэдээлэл тархах болов.
Засгийн газрын хэрэг эрхлэх газрын дэд дарга, Эрдэнэс Тавантолгой ХК-ийн ТУЗ-ийн даргаар ажиллаж байсан тэрээр Говь Повер компанийн 17 тэрбумын тендерийн хэрэг мандахад үүрэгт ажлаа өгч нам жим болсон. Удалгүй Герман руу явж асуудал намжтал эзгүй байхыг хичээсэн. Гэвч түүнийг явснаас хойш Эрдэнэс Тавантолгойн ХК-ийн захирал Я.Батсуурь баривчилагдаж асуудал нэлээд ширүүссэн. Энэ бүгдэд нөгөө л Дэнзэнгийн нэр холбогдож явсан юм.
Г.Дэнзэн хэвлэлээр өөрийгөө буруугүй хэмээн ил захидал илгээсэн. Ингэсээр байтал АТГ-ынхан түүнийг мөрдөх ажлаа зогсоолгүй эх орондоо ирснийх нь дараа баривчилсан хэрэг үү. Үнэхээр баривчилсан, үгүй эсэхэд АТГ-аас өнөөдөр тодорхой тайлбар өгөх биз ээ.
Эх сурвалж: www.times.mn
